ਲੁਧਿਆਣਾ : ਪੰਜਾਬ ਪੁਲਸ ਨੇ ਫਿਲੌਰ ਨੇੜੇ ਹਾਈਟੈਕ ਨਾਕੇ 'ਤੇ ਵੱਡੀ ਮਾਤਰਾ 'ਚ ਨਕਦੀ ਬਰਾਮਦ ਕੀਤੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਲੱਖਾਂ ਰੁਪਏ ਦੀ ਇਹ ਨਕਦੀ ਲੁਧਿਆਣਾ ਤੋਂ ਜੰਮੂ-ਕਸ਼ਮੀਰ ਜਾ ਰਹੀ ਸੀ। ਇਹ ਸਾਰੀ ਰਕਮ ਸੱਟੇਬਾਜ਼ਾਂ ਨਾਲ ਸਬੰਧਤ ਦੱਸੀ ਜਾਂਦੀ ਹੈ ਅਤੇ ਇਸ ਵਿੱਚ ਜੰਮੂ-ਕਸ਼ਮੀਰ ਦੇ ਗੈਂਗਸਟਰਾਂ ਅਤੇ ਅੱਤਵਾਦੀਆਂ ਦਾ ਸਬੰਧ ਵੀ ਸਾਹਮਣੇ ਆ ਸਕਦਾ ਹੈ। ਦੱਸਿਆ ਗਿਆ ਹੈ ਕਿ ਕਰੀਬ 20 ਲੱਖ ਰੁਪਏ ਦੀ ਇਹ ਰਾਸ਼ੀ ਇਕ ਗੱਡੀ ਵਿਚ 3 ਵੱਖ-ਵੱਖ ਥੈਲਿਆਂ ਵਿਚ ਲੁਧਿਆਣਾ ਤੋਂ ਭੇਜੀ ਜਾ ਰਹੀ ਸੀ। ਸੂਤਰਾਂ ਦਾ ਕਹਿਣਾ ਹੈ ਕਿ ਇਹ ਰਕਮ ਜੰਮੂ-ਕਸ਼ਮੀਰ ਜਾਣੀ ਸੀ। ਇਹ ਵੀ ਦੱਸਿਆ ਜਾ ਰਿਹਾ ਹੈ ਕਿ ਇਹ ਰਕਮ ਅੱਤਵਾਦੀਆਂ ਨੂੰ ਫੰਡਿੰਗ ਨਾਲ ਵੀ ਜੁੜੀ ਹੋ ਸਕਦੀ ਹੈ। ਹਾਈਟੈਕ ਨਾਕੇ 'ਤੇ ਜਿਵੇਂ ਹੀ ਪੁਲਸ ਨੂੰ ਸੂਚਨਾ ਮਿਲੀ ਕਿ ਗੱਡੀ 'ਚ ਭਾਰੀ ਮਾਤਰਾ 'ਚ ਨਕਦੀ ਆ ਰਹੀ ਹੈ ਤਾਂ ਪੁਲਸ ਤਿਆਰ ਹੋ ਗਈ। ਪੁਲੀਸ ਨੇ ਜਦੋਂ ਵਾਹਨਾਂ ਦੀ ਚੈਕਿੰਗ ਕੀਤੀ ਤਾਂ ਇੱਕ ਗੱਡੀ ਵਿੱਚੋਂ ਤਿੰਨ ਬੈਗ ਬਰਾਮਦ ਹੋਏ। ਇਨ੍ਹਾਂ ਬੈਗਾਂ ਸਮੇਤ ਤਿੰਨ ਨੌਜਵਾਨ ਵੀ ਫੜੇ ਗਏ ਹਨ। ਜੋ ਲੁਧਿਆਣਾ ਤੋਂ ਆ ਰਹੇ ਸਨ। ਫਿਲਹਾਲ ਪੁਲਸ ਦੇ ਉੱਚ ਅਧਿਕਾਰੀ ਮੌਕੇ 'ਤੇ ਪਹੁੰਚ ਗਏ ਹਨ ਅਤੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਪੁਲਿਸ ਨੇ ਇਨਕਮ ਟੈਕਸ ਵਿਭਾਗ ਨੂੰ ਵੀ ਸੂਚਿਤ ਕਰ ਦਿੱਤਾ ਹੈ। ਸੂਤਰਾਂ ਦਾ ਕਹਿਣਾ ਹੈ ਕਿ ਲੁਧਿਆਣਾ ਤੋਂ ਪੰਜਾਬ ਅਤੇ ਜੰਮੂ-ਕਸ਼ਮੀਰ ਵਿਚ ਵੱਡੀ ਰਕਮ ਟਰਾਂਸਫਰ ਕੀਤੀ ਜਾ ਰਹੀ ਹੈ ਅਤੇ ਪੁਲਿਸ ਅਜੇ ਤੱਕ ਇਸ ਤੋਂ ਅਣਜਾਣ ਹੈ।
