Punjab: ਸਾਬਕਾ ਮੰਤਰੀ ਖਿਲਾਫ ਗਲਾਡਾ ਦੀ ਵੱਡੀ ਕਾਰਵਾਈ, ਮਾਮਲਾ ਦਰਜ,

ਲੁਧਿਆਣਾ : ਗਲਾਡਾ ਵਲੋਂ ਲੁਧਿਆਣਾ ਦੀ ਤਰਫੋਂ ਸੜਕਾਂ, ਸਟਰੀਟ ਲਾਈਟਾਂ, ਸੀਵਰੇਜ ਤੋੜ ਕੇ ਬਿਨਾਂ ਮਨਜ਼ੂਰੀ ਤੋਂ ਬਣਾਈਆਂ ਜਾ ਰਹੀਆਂ ਕਲੋਨੀਆਂ ਖਿਲਾਫ ਕਾਰਵਾਈ ਕੀਤੀ ਜਾ ਰਹੀ ਹੈ ਅਤੇ ਕਲੋਨੀ ਮਾਲਕਾਂ ਖਿਲਾਫ ਪੁਲਸ ਕੇਸ ਦਰਜ ਕਰਨ ਦੀ ਸਿਫਾਰਿਸ਼ ਕੀਤੀ ਜਾ ਰਹੀ ਹੈ। ਇਸੇ ਤਰ੍ਹਾਂ ਗਲਾਡਾ ਨੇ ਹੁਣ ਉਨ੍ਹਾਂ ਕਲੋਨੀ ਮਾਲਕਾਂ ਖ਼ਿਲਾਫ਼ ਕਾਰਵਾਈ ਕਰਨ ਦਾ ਫੈਸਲਾ ਕੀਤਾ ਹੈ, ਜਿਨ੍ਹਾਂ ਨੇ ਗਲਾਡਾ ਤੋਂ ਮਨਜ਼ੂਰੀ ਤਾਂ ਲੈ ਲਈ ਹੈ ਪਰ ਬਕਾਇਆ ਫੀਸ ਜਮ੍ਹਾਂ ਨਹੀਂ ਕਰਵਾਈ ਹੈ। ਅਜਿਹੇ 'ਚ ਪੁਲਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ। ਇਹ ਕਲੋਨੀ ਲਲਤੋਂ ਕਲਾਂ ਗਰਾਊਂਡ ਨਾਮ ਦੀ ਕਲੋਨੀ ਹੈ, ਜਿਸ ਦੀ ਮਨਜ਼ੂਰੀ ਲੈਣ ਤੋਂ ਬਾਅਦ ਬਕਾਇਆ ਫੀਸ ਜਮ੍ਹਾਂ ਨਹੀਂ ਕਰਵਾਈ ਗਈ। ਇਸ ਕਲੋਨੀ ਦਾ ਮਾਲਕ ਸਾਬਕਾ ਮੰਤਰੀ ਜਗਦੀਸ਼ ਸਿੰਘ ਗਰਚਾ ਦੱਸਿਆ ਜਾਂਦਾ ਹੈ, ਜਿਸ ਖ਼ਿਲਾਫ਼ ਥਾਣਾ ਸਦਰ ਵਿੱਚ ਕੇਸ ਦਰਜ ਕਰ ਲਿਆ ਗਿਆ ਹੈ। ਇਹ ਕਾਰਵਾਈ ਗਲਾਡਾ ਦੇ ਏ.ਸੀ.ਏ. ਦੇ ਆਧਾਰ 'ਤੇ ਕੀਤੀ ਗਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਕਤ ਕਲੋਨੀ ਮਾਲਕ ਵੱਲੋਂ ਨਾ ਤਾਂ ਲਾਇਸੈਂਸ ਰੀਨਿਊ ਕਰਵਾਇਆ ਗਿਆ ਅਤੇ ਨਾ ਹੀ ਗਲਾਡਾ ਵੱਲ ਬਕਾਇਆ ਕਰੀਬ 14 ਕਰੋੜ ਰੁਪਏ ਦੀ ਰਾਸ਼ੀ ਜਮ੍ਹਾਂ ਕਰਵਾਈ ਗਈ। ਇਸ ਲਈ ਇਹ ਸਪੱਸ਼ਟ ਹੋ ਗਿਆ ਹੈ ਕਿ ਆਉਣ ਵਾਲੇ ਦਿਨਾਂ ਵਿੱਚ ਗਲਾਡਾ ਵੱਲੋਂ ਉਨ੍ਹਾਂ ਕਲੋਨੀ ਮਾਲਕਾਂ ਖ਼ਿਲਾਫ਼ ਵੀ ਕਾਰਵਾਈ ਕੀਤੀ ਜਾਵੇਗੀ, ਜਿਨ੍ਹਾਂ ਨੇ ਮਨਜ਼ੂਰੀ ਤਾਂ ਲੈ ਲਈ ਹੈ ਪਰ ਬਕਾਇਆ ਫੀਸ ਜਮ੍ਹਾਂ ਨਹੀਂ ਕਰਵਾਈ ਹੈ। ਇਸ ਤਰ੍ਹਾਂ ਗਲਾਡਾ ਦੀ ਪਹਿਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ। ਜਿਸ ਵਿੱਚ ਪਹਿਲਾ ਮਾਮਲਾ ਮੰਤਰੀ ਗਰਚਾ ਖ਼ਿਲਾਫ਼ ਗਲਾਡਾ ਦੇ ਏ.ਸੀ.ਏ. ਥਾਣਾ ਸਦਰ 'ਚ  ਦਰਜ ਕਰ ਲਿਆ ਗਿਆ ਹੈ।