ਲੁਧਿਆਣਾ ਦੇ ਕੁੰਦਨਪੁਰੀ ਇਲਾਕੇ ਦੇ ਲੋਕ ਨਸ਼ੇੜੀਆਂ ਅਤੇ ਨਸ਼ਾ ਤਸਕਰਾਂ ਤੋਂ ਪ੍ਰੇਸ਼ਾਨ ਹਨ। ਕੱਲ੍ਹ ਲੋਕਾਂ ਨੇ ਖੁਦ ਜਾਲ ਵਿਛਾ ਕੇ ਨਸ਼ੇੜੀਆਂ ਨੂੰ ਫੜ ਲਿਆ। ਲੋਕਾਂ ਨੇ ਇਲਾਕਾ ਪੁਲਿਸ ਨੂੰ ਸੂਚਨਾ ਦਿੱਤੀ। ਲੋਕਾਂ ਨੇ ਟ੍ਰੈਪ ਲਗਾਕੇ ਨਸ਼ੇੜੀਆਂ ਨੂੰ ਕਾਬੂ ਕੀਤਾ। ਇਲਾਕਾ ਵਾਸੀਆਂ ਨੇ ਕੁੰਦਨਪੁਰੀ ਪੁਲੀ ਨੇੜੇ ਇੱਕ ਆਟੋ ਵਿੱਚ ਨਸ਼ੇ ਦੇ ਟੀਕੇ ਲਾ ਰਹੇ ਦੋ ਵਿਅਕਤੀਆਂ ਨੂੰ ਕਾਬੂ ਕੀਤਾ। ਇਲਾਕੇ ਵਿੱਚ ਰੋਜ਼ਾਨਾ ਲੋਕਾਂ ਦੇ ਵਾਹਨਾਂ ਦੀਆਂ ਬੈਟਰੀਆਂ ਚੋਰੀ ਹੋ ਰਹੀਆਂ ਹਨ।
ਇਲਾਕਾ ਨਿਵਾਸੀ ਬਿੰਦੂ ਨੇ ਦੱਸਿਆ ਕਿ ਹਰ ਰੋਜ਼ ਦੀ ਤਰ੍ਹਾਂ ਜਦੋਂ ਉਸ ਨੇ ਖਾਲੀ ਪਲਾਟ 'ਚੋਂ ਆਪਣੀ ਕਾਰ ਕੱਢੀ ਤਾਂ ਉਹ ਹੈਰਾਨ ਰਹਿ ਗਈ। ਉਸ ਦੀ ਕਾਰ ਦੀ ਬੈਟਰੀਆਂ ਗਾਇਬ ਸੀ। ਬਿੰਦੂ ਅਨੁਸਾਰ 15 ਦਿਨ ਪਹਿਲਾਂ ਹੀ ਨਵੀ ਬੈਟਰੀ ਖਰੀਦੀ ਗਈ ਸੀ। ਫੜੇ ਗਏ ਨਸ਼ੇੜੀ ਕੈਲਾਸ਼ ਨਗਰ ਚੌਕ ਦੇ ਰਹਿਣ ਦਾ ਦਾਅਵਾ ਕਰ ਰਹੇ ਹਨ। ਇਨ੍ਹਾਂ ਨਸ਼ੇੜੀਆਂ ਨੂੰ ਚਮਚ ਨਾਲ ਨਸ਼ੀਲਾ ਪਦਾਰਥ ਮਿਲਾ ਕੇ ਨਾੜੀਆਂ ਵਿੱਚ ਟੀਕਾ ਲਗਾਉਂਦੇ ਹੋਏ ਰੰਗੇ ਹੱਥੀਂ ਕਾਬੂ ਕੀਤਾ ਗਿਆ।
ਨਸ਼ੇੜੀ ਨੇ ਖੁਲਾਸਾ ਕੀਤਾ ਕਿ ਉਹ ਪੀਰੂਬੰਦਾ ਇਲਾਕੇ ਦੀ ਰਹਿਣ ਵਾਲੀ ਪ੍ਰਿਅੰਕਾ ਨਾਂ ਦੀ ਔਰਤ ਤੋਂ 200 ਰੁਪਏ ਦੀ ਹੈਰੋਇਨ ਲਿਆਉਂਦਾ ਹੈ। ਸੂਈਆਂ ਵਾਲਾ ਹਸਪਤਾਲ ਦੇ ਬਾਹਰੋਂ ਨਸ਼ੇੜੀ ਟੀਕੇ ਦੀ ਸਰਿੰਜ ਲੈ ਕੇ ਜਾਂਦਾ ਹੈ। ਉਹ ਪਿਛਲੇ 6 ਸਾਲਾਂ ਤੋਂ ਚਿੱਟੇ ਦਾ ਆਦੀ ਸੀ। ਪਿਛਲੇ ਕਈ ਦਿਨਾਂ ਤੋਂ ਉਹ ਕੁੰਦਨਪੁਰੀ ਇਲਾਕੇ ਵਿੱਚ ਨਸ਼ੇ ਦਾ ਸੇਵਨ ਕਰਨ ਲਈ ਆ ਰਿਹਾ ਸੀ। ਦੱਸ ਦਈਏ ਕਿ ਇਹ ਉਹੀ ਇਲਾਕਾ ਹੈ ਜਿੱਥੋਂ ਕੁਝ ਸਮਾਂ ਪਹਿਲਾਂ ਲੋਕਾਂ ਨੇ ਦੋ ਪੁਲਿਸ ਮੁਲਾਜ਼ਮਾਂ ਨੂੰ ਨਸ਼ਾ ਕਰਦੇ ਫੜਿਆ ਸੀ।
ਲੋਕਾਂ ਦੇ ਜਾਲ ਵਿੱਚ ਫਸਣ ਦੇ ਤੁਰੰਤ ਬਾਅਦ ਨਸ਼ੇੜੀ ਨੇ ਚਿੱਟੇ ਦਾ ਭਰਿਆ ਚਮਚਾ ਅਤੇ ਇੱਕ ਟੀਕਾ ਜ਼ਮੀਨ 'ਤੇ ਸੁੱਟ ਦਿੱਤਾ। ਉਹ ਲੋਕਾਂ ਤੋਂ ਮੁਆਫੀ ਮੰਗਣ ਲੱਗਾ। ਲੋਕਾਂ ਨੇ ਤੁਰੰਤ ਪੁਲਿਸ ਨੂੰ ਸੂਚਨਾ ਦਿੱਤੀ। ਕੈਲਾਸ਼ ਨਗਰ ਚੌਕੀ ਦੀ ਪੁਲਿਸ ਨੇ ਘਟਨਾ ਵਾਲੀ ਥਾਂ ’ਤੇ ਛਾਪਾ ਮਾਰ ਕੇ ਨਸ਼ੇ ਵਾਲੇ ਵਿਅਕਤੀ ਨੂੰ ਕਾਬੂ ਕੀਤਾ ਹੈ।
ਪੁਲਿਸ ਨੇ ਛਾਪਾ ਮਾਰ ਕੇ ਦੋਵਾਂ ਨੌਜਵਾਨਾਂ ਨੂੰ ਕਾਬੂ ਕਰ ਲਿਆ। ਇਲਾਕੇ ਵਿੱਚ ਮੈਡੀਕਲ ਦੀ ਦੁਕਾਨ ਚਲਾਉਣ ਵਾਲੇ ਹਰੀਸ਼ ਕੁਮਾਰ ਨੇ ਦੱਸਿਆ ਕਿ ਨਸ਼ੇੜੀ ਵਿਅਕਤੀ ਹਸਪਤਾਲ ਤੋਂ ਸੂਈਆਂ ਨਾਲ ਟੀਕੇ ਲੈ ਕੇ ਆਉਂਦੇ ਹਨ ਅਤੇ ਫਿਰ ਖਾਲੀ ਪਲਾਟ ਵਿੱਚ ਲੁਕ ਕੇ ਨਸ਼ੇ ਕਰਦੇ ਹਨ। ਹਰ ਰੋਜ਼ ਵੱਡੀ ਗਿਣਤੀ ਵਿੱਚ ਨੌਜਵਾਨ ਗਰੁੱਪਾਂ ਵਿੱਚ ਆਉਂਦੇ ਹਨ ਅਤੇ ਖੁੱਲ੍ਹੇਆਮ ਚਿੱਟੇ ਦਾ ਸੇਵਨ ਕਰਦੇ ਹਨ। ਜੇਕਰ ਕੋਈ ਇਲਾਕਾ ਨਿਵਾਸੀ ਵਿਰੋਧ ਕਰਦਾ ਹੈ ਤਾਂ ਉਹ ਉਸ 'ਤੇ ਜਾਨਲੇਵਾ ਹਮਲਾ ਵੀ ਕਰ ਦਿੰਦੇ ਹਨ।
ਹਰੀਸ਼ ਨੇ ਦੱਸਿਆ ਕਿ ਇਲਾਕੇ ਵਿੱਚ ਲਗਾਤਾਰ ਚੋਰੀਆਂ ਹੋ ਰਹੀਆਂ ਹਨ। ਇਸ ਕਾਰਨ ਲੋਕ ਖੁਦ ਹੀ ਹੁਣ ਨਸ਼ੇੜੀਆਂ ਨੂੰ ਫੜਨ ਵਿੱਚ ਲੱਗੇ ਹੋਏ ਹਨ। ਹਰੀਸ਼ ਅਨੁਸਾਰ ਇਸ ਤੋਂ ਪਹਿਲਾਂ ਵੀ ਕਈ ਵਾਰ ਉਸ ਨੇ ਕਈ ਨਸ਼ਾ ਤਸਕਰਾਂ ਨੂੰ ਪੁਲਿਸ ਦੇ ਹਵਾਲੇ ਕੀਤਾ ਸੀ ਪਰ ਕੁਝ ਸਮੇਂ ਬਾਅਦ ਪੁਲਿਸ ਨੇ ਉਨ੍ਹਾਂ ਨੂੰ ਛੱਡ ਦਿੱਤਾ।
