ਆਪਣੇ 7.6 ਫੁੱਟ ਲੰਬੇ ਕੱਦ ਕਾਰਨ ਅਮਰੀਕਾ ਦੇ ਗੌਟ ਟੈਲੇਂਟ ਵਿੱਚ ਪਹੁੰਚ ਕੇ ਵਿਸ਼ਵ ਭਰ ਵਿੱਚ ਪ੍ਰਸਿੱਧੀ ਹਾਸਲ ਕਰਨ ਵਾਲਾ ਪੰਜਾਬ ਪੁਲਿਸ ਦਾ ਸਾਬਕਾ ਕਾਂਸਟੇਬਲ ਜਗਦੀਪ ਸਿੰਘ ਹੁਣ ਸਲਾਖਾਂ ਪਿੱਛੇ ਹੈ। ਪੰਜਾਬ ਪੁਲਿਸ ਦੇ ਸਟੇਟ ਸਪੈਸ਼ਲ ਆਪ੍ਰੇਸ਼ਨ ਸੈੱਲ (SSOC) ਵੱਲੋਂ ਪੁੱਛਗਿੱਛ ਦੌਰਾਨ ਜਗਦੀਪ ਨੇ ਦੱਸਿਆ ਕਿ ਉਸ ਦੀ ਪਤਨੀ ਨਸ਼ੇ ਦੀ ਆਦੀ ਹੋ ਗਈ ਸੀ। ਉਸ ਨੂੰ ਨਸ਼ਾ ਮੁਹੱਈਆ ਕਰਵਾਉਣ ਲਈ ਉਹ ਇਸ ਧੰਦੇ ਵਿਚ ਸ਼ਾਮਲ ਹੋ ਗਿਆ। ਉਸ ਦੀ ਪਤਨੀ ਹੁਣ ਨਸ਼ਾ ਛੁਡਾਊ ਕੇਂਦਰ ਵਿਚ ਹੈ ਅਤੇ ਉਹ ਖੁਦ ਵੀ ਸਲਾਖਾਂ ਪਿੱਛੇ ਹੈ।
ਅੰਮ੍ਰਿਤਸਰ ਦੇ ਪਿੰਡ ਜਠੋਲ ਦੇ ਰਹਿਣ ਵਾਲੇ ਜਗਦੀਪ ਨੇ ਪੰਜਾਬ ਪੁਲਿਸ ਵਿੱਚ ਕਾਂਸਟੇਬਲ ਵਜੋਂ ਸੇਵਾ ਨਿਭਾਈ। ਆਪਣੀ ਪਤਨੀ ਦੇ ਨਸ਼ੇ ਦੀ ਪੂਰਤੀ ਲਈ ਉਸ ਨੇ ਨੌਕਰੀ ਦੌਰਾਨ ਤਸਕਰੀ ਕਰਨੀ ਸ਼ੁਰੂ ਕਰ ਦਿੱਤੀ। ਜਗਦੀਪ ਦਾ ਪਿਤਾ ਸੁਖਦੇਵ ਅਤੇ ਭਰਾ ਮਲਕੀਤ ਦੋਵੇਂ ਨਸ਼ਾ ਤਸਕਰੀ ਦੇ ਧੰਦੇ ਵਿੱਚ ਸ਼ਾਮਲ ਸਨ। ਪਿਤਾ ਜੇਲ੍ਹ ਵਿੱਚ ਹੈ ਅਤੇ ਭਰਾ ਫਰਾਰ ਹੈ। ਉਹ ਉਨ੍ਹਾਂ ਦੇ ਨੈੱਟਵਰਕ ਦੀ ਵਰਤੋਂ ਕਰਕੇ ਇਸ ਕੰਮ ਵਿੱਚ ਆਇਆ ਸੀ।
ਜਦੋਂ ਜਗਦੀਪ ਨੂੰ ਨਸ਼ਾ ਵੇਚਣ ਤੋਂ ਫਾਇਦਾ ਹੋਣ ਲੱਗਾ ਤਾਂ ਉਸ ਨੇ ਪੁਲਸ ਦੀ ਨੌਕਰੀ ਛੱਡਣ ਦਾ ਫੈਸਲਾ ਕਰ ਲਿਆ। ਜਗਦੀਪ ਨੇ ਪਰਿਵਾਰਕ ਕਾਰਨਾਂ ਕਰਕੇ ਨੌਕਰੀ ਛੱਡ ਦਿੱਤੀ। ਇਸ ਤੋਂ ਬਾਅਦ ਉਹ ਪਾਕਿਸਤਾਨ ਦੇ ਦੋ ਨਸ਼ਾ ਤਸਕਰਾਂ ਬਾਬਾ ਇਮਰਾਲ ਅਤੇ ਅਲੀ ਸ਼ਾਹ ਨਾਲ ਜੁੜ ਗਿਆ। ਉਹ ਹਮੇਸ਼ਾ 500 ਗ੍ਰਾਮ ਤੋਂ ਲੈ ਕੇ 1 ਕਿਲੋਗ੍ਰਾਮ ਤੱਕ ਦੀਆਂ ਖੇਪਾਂ ਦਾ ਆਰਡਰ ਦਿੰਦਾ ਸੀ, ਤਾਂ ਜੋ ਇਸ ਨੂੰ ਆਸਾਨੀ ਨਾਲ ਲੁਕਵੇਂ ਬਾਰਡਰ ਤੋਂ ਪੰਜਾਬ ਅਤੇ ਆਸ-ਪਾਸ ਦੇ ਜ਼ਿਲ੍ਹਿਆਂ ਤੱਕ ਪਹੁੰਚਾਇਆ ਜਾ ਸਕੇ।
ਜਗਦੀਪ ਨੇ ਪੰਜਾਬ ਪੁਲਿਸ ਵਿੱਚ ਰਹਿੰਦਿਆਂ ਹੀ ਤਸਕਰੀ ਕਰਨੀ ਸ਼ੁਰੂ ਕਰ ਦਿੱਤੀ ਸੀ। ਨੌਕਰੀ ਛੱਡਣ ਤੋਂ ਬਾਅਦ ਵੀ ਉਹ ਆਪਣੇ ਲੰਬੇ ਕੱਦ ਕਾਰਨ ਸਾਰਿਆਂ ਵਿਚ ਮਸ਼ਹੂਰ ਸੀ। ਇਸ ਦੀ ਆੜ ਵਿੱਚ ਉਹ ਬਾਰਡਰ ਤੋਂ ਖੇਪ ਚੁੱਕ ਕੇ ਪੰਜਾਬ ਵਿੱਚ ਸਪਲਾਈ ਕਰਦਾ ਸੀ। ਉਸ ਦੀ ਕਾਰ ਨੂੰ ਕਈ ਵਾਰ ਨਾਕੇ 'ਤੇ ਰੋਕਿਆ ਗਿਆ, ਪਰ ਉਸ ਦੀ ਸ਼ੋਹਰਤ ਕਾਰਨ ਪੁਲਿਸ ਉਸ ਦੀ ਕਾਰ ਦੀ ਜਾਂਚ ਨਹੀਂ ਕਰਦੀ ਸੀ।
