ਮੋਹਾਲੀ ਦੇ ਨਯਾਗਾਓਂ 'ਚ ਐਤਵਾਰ ਨੂੰ ਇੱਕ ਦੁਕਾਨਦਾਰ ਦੇ ਘਰੋਂ ਹੋਈ ਲੁੱਟ ਦੇ ਮਾਮਲੇ 'ਚ ਪੁਲਿਸ ਨੇ ਲੁਟੇਰਿਆਂ ਦੇ ਆਉਣ ਦੀ CCTV ਵੀਡੀਓ ਚੈੱਕ ਕੀਤੀ ਹੈ। ਇਸ ਵਿੱਚ ਤਿੰਨ ਮੁਲਜ਼ਮ ਇੱਕ ਪਲਸਰ ਮੋਟਰਸਾਈਕਲ ’ਤੇ ਆਉਂਦੇ ਦਿਖਾਈ ਦੇ ਰਹੇ ਹਨ। ਤਿੰਨਾਂ ਨੇ ਹੈਲਮੇਟ ਨਾਲ ਮੂੰਹ ਢੱਕਿਆ ਹੋਇਆ ਹੈ। ਪੁਲਿਸ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ਪਰ ਅਜੇ ਤੱਕ ਦੋਸ਼ੀਆਂ ਦਾ ਕੋਈ ਸੁਰਾਗ ਨਹੀਂ ਲੱਗਾ ਹੈ।
ਪੀੜਤ ਅਸ਼ਵਨੀ ਗੋਇਲ ਨੇ ਦੱਸਿਆ ਕਿ ਉਹ ਦੁਕਾਨ 'ਤੇ ਬੈਠਾ ਸੀ। ਉੱਥੇ ਇੱਕ ਵਿਅਕਤੀ ਆਇਆ। ਉਸ ਨੇ ਪਿਸਤੌਲ ਉਸ ਦੀ ਗਰਦਨ 'ਤੇ ਰੱਖ ਦਿੱਤਾ। ਇਸ ਤੋਂ ਬਾਅਦ ਦੂਜੇ ਦੋਸ਼ੀ ਨੇ ਆ ਕੇ ਚਾਕੂ ਦਿਖਾਕੇ ਧਮਕਾਇਆ। ਜਾਨੋਂ ਮਾਰਨ ਦਾ ਡਰਾਵਾ ਦੇਕੇ ਉਹ ਉਸਨੂੰ ਪਹਿਲੀ ਮੰਜ਼ਿਲ 'ਤੇ ਸਥਿਤ ਘਰ 'ਚ ਲੈ ਗਿਆ। ਉੱਥੇ ਲੁਟੇਰਿਆਂ ਨੇ ਪੀੜਤ ਨੂੰ ਪਲਾਸਟਿਕ ਦੀਆਂ ਰੱਸੀਆਂ ਨਾਲ ਬੰਨ੍ਹਿਆ, ਇਸ ਤੋਂ ਬਾਅਦ ਉਸ ਦੀ ਕੁੱਟਮਾਰ ਕੀਤੀ ਅਤੇ ਉਸ ਦੇ ਘਰ ਰੱਖੇ ਗਹਿਣਿਆਂ ਬਾਰੇ ਪੁੱਛ-ਪੜਤਾਲ ਕੀਤੀ।
ਗੋਇਲ ਨੇ ਦੱਸਿਆ ਕਿ ਲੁਟੇਰੇ 8 ਤੋਲੇ ਸੋਨਾ, 50 ਹਜ਼ਾਰ ਰੁਪਏ ਨਕਦ ਅਤੇ ਹੋਰ ਗਹਿਣੇ ਲੈ ਗਏ। ਮੁਹਾਲੀ ਪੁਲਿਸ ਦੇ SP ਸਿਟੀ ਅਕਾਸ਼ਦੀਪ ਸਿੰਘ ਔਲਖ ਅਤੇ DSP ਸਿਟੀ-1 ਪ੍ਰਭਜੋਤ ਕੌਰ ਨੇ ਮੌਕੇ ’ਤੇ ਜਾ ਕੇ ਮਾਮਲੇ ਦੀ ਜਾਂਚ ਕੀਤੀ।
